تمزيق باج في الحقوق تسبب بمشاجرة بين المستقلة و المتحدون

[+88]

وقعت مشاجرة بين قائمتي المتحدون و المستقلة في كلية الحقوق عصر امس الاثنين و شهدت المشاجرة تشابكا بالايدي و صراخا عاليا في اروقة الكلية بسبب عثور احد اعضاء قائمة المستقلة على باج ممزق في صالة الكلية فأطلق العضو سبة عابرة على ممزق الباج المجهول ،
و على اثر ذلك اطلق احد اعضاء قائمة المتحدون عبارات اللوم لعضو المستقلة على تفوهه بهذا اللفظ النابي في حرم الجامعة ايا كان ممزق هذا الباج و لم تعجب عضو قائمة المستقلة الطريقة التي انتقده بها عضو قائمة المستقلة و حينئذ نشبت المشاجرة بينهما و التي تطورت لتشابك بالايدي و تطاول بالالفاظ بين العضوين لكن المشاجرة انتهت سريعا لقيام بقية الطلبة من القائمتين بفظ الاشتباك .
و قد استنكر منسقا القائمتين ابراهيم السهلي منسق قائمة المتحدون و عدنان ابل منسق قائمة المستقلة هذا النوع من المشاجرات التي لا تناسب الحرم الجامعي ولا تتفق مع الاسس السليمة للعمل النقابي الصحيح في الجامعة و تمنى منسقا القائمتين الا تتكرر هذه المشاجرات التي ازدادت بشكل ملحوظ في الجامعة اخيرا .

المصدر : جريدة السياسة _ الثلاثاء 28/2/2006

التعليق

للأسف نرى هالتصرفات من بعض الطلبة و عدم احترام لباج يحمل صورة المغفور له الشيخ جابر الاحمد رحمه الله و وصلت الدناءة لدى بعض ( المرضى ) انهم يشقون باج يحمل صورة الامير الراحل لمجرد ان القائمة المستقلة اهي اللي اصدرت هالباج و فوق هذا يحاولون الاعتداء على من انتقد هالتصرف و ما اقول هالكلام دفاعا عن عضو قائمتي و لكن دفاعا عن الحق و للعلم عضو المستقلة طالب دفعة 2001 و عضو المتحدون طالب دفعة 2005 و اترفع عن ذكر الالفاظ النابية اللي ذكرها هالشخص على مرأى و مسمع جميع الطلبة الموجودين وقتها و الباج كان معلق على نوت عضو المستقلة و اخذه شخص مجهول و شقه و نرى من يدافع عنه بعد كل هذا !!

[خالد الفالح]

للأسف وصلت الدنائة الانتخابية المصلحجية عند البعض الى فعل اي شيء يبين ما مدلى كرهه للمنافسة الشريفة حتى و ان كان هذا الكره من خلال التعدي على رمز الكويت الخالد ابونا جابر الله يرحمه ..

على هذه الفئة احترام الكويت و رمزها و احترام الارض و الروابط الوطنية و الزمالة الجامعية (( و كلنا عيال قرية و كلن يعرف خيه )) و إلا العقاب ..

تحياتي ..

[Shaymaa]

حبنا لأميرنا كبير و لم اتوقع ان تصل الغيرة الى تمزيق باج يحمل صورة
والدنا الراحل رحمه الله ،، هل هي غيرة من انتشار هذا الباج بكل مكان ؟

احترام المنافس يجبر الجميع على احترامك ،، ان لم ترد احترامه فاحترم أميرك الراحل
الذي لا يختلف اثنان على أنه الوالد

[N.Al-Mutawaa]

أصحاب العقول في نعيم...


:aa_neqash:

[I C]

السلام عليكم ....


شي يضيق الخلق والله
ماقاموا يفرقوون بين الصح والخطأ

---

شكرا على الموضوع
فمان الله

[مستقلاوية موت]

المفروض عقول الناس تكون اكبر من جذي

ويحترمون المكان الي همه فيه وصوره الشيخ جابر الي محفوره عالباج

عالاقل احترام للشخص وللوطنيه قبل القوائم



حسااااااااااااا ااااااااااااااف ه وصلنا لهني ترى الديره ماتستاهل

كل الي قاعد يصير

[آدابي مستقلة]

مو معقولة اللي قاعد يصير بجامعتنا
ليش جذي
ليش ما نرتقي بطرحنا و بكلامنا ليش نستعمل القوة بسرعة؟؟
و ليش صارت القوائم تعادي بعضها
يا جماعة احنا عيال ديرة وحدة و كلنا بنتخرج و يمكن باجر نتلاقى بمكان ثاني تكون بيننا مصالح
وحدة
المهم التصرف اللي صار تصرف غلط
و المفروض يكون هناك احترام للمكان و لصورة الشيخ جابر

[مستقلة ولي الشرف]

للاسف ان صاار العنف والهوااش اول السبل الي يلجأ حقها الطلبه لييش يا مستقله لييش
حتى لو كان في منافسه بينا وبينهم المفروض بحدود الاخوه والصداقه واذا اهم ماحترموا نفسهم فاحنا نترفع عن الرد عليهم لانهم مو مستوى فكري نقدر نتناقش معاه بس انا ننزل لمستواهم وتوصل درجه الطق لا سمحولي الغلط من الاثنين والكلام موجه لكل اعضاء المستقله

[mostaqilla4ever]

اللي حصل مو شي يديد فيوم توفى الشيخ جابر رحمه الله كنت قاعد اعلق ورقة رثاء للشيخ جابر من القائمة المستقلة بالكلية وأتفاجأ بالمتحدون ياخذون الاوراق ويقطونهم فهذا الشي مو يديد على الائتلافيه ولا على قائمة المتحدون

[CSS]

للاسف الانتخابات عمتهم.. وماخلتهم يحسون بأي شي وبأي شعور اتجاه اي شي ثاني

همهم بس انتخابات في انتخابات

مايعرفون شي اسمه سمعه واحترام وتقدير


صج واسفااااااااااا ااااااااااه على مثل هالناس

اللي داشه اكبر صرح تعليمي بالكويت

ويتصرفون تصرفات طفوليه... حتى الاطفال ما اعتقد انهم يسووون جذي



يالله عشنا وشفنا

وياما حنشوووووووووووو ووف




والله يهدي الجميع

[Al-ShaiJi]

ترى و الله ذبحتونا كل يوم هوشة ؟؟ و الله ناس فاضية ما عندهم سالفة .. و بعدين يقولون ليش الطلبة ما يصوتون .. شوفوا فعايلكم .. واحد و شق الباج .. نذبحه يعني ؟ و الثاني رد .. يبا كيفهم

ليش يا جماعة وايد صايرين شرارة .. من واحد سوا شي انفجرتوا

هدوا يا شباب .. المستجدين اكرهوا الانتخابات و السبة فعايل بعض الناس اللي 24 ساعة هواش

شكرا

[a3lamiyaa]

للعلم فقط من قام ببدأ المشاجره عضو القائمة المتحدون...كون عضو المستقلة كان يتحدث مع منسق المستقلة.... وبلقافة عضو المتحدون تدخل بنص حديث أعضاء المستقلة وتعرض لعضو المستقلة......ل لعلم فقط

[N.Al-Mutawaa]

شي مو غريب عليهم... الويه منجب على الآخر... بركات أبوهم الروحي "التمساح"

على يوم بسويه بوووك!

تحياتي

[Don 3ziz]

الله يرحم ابونا جابر =(

بس في سؤال يدور ببالي !!

شلون عرفتوا منو اللي شق الباج ؟؟؟ مو انتو اللي تقولون ان الفاعل مجهووول !!

يعني يمكن واحد من المستقلة شق الباج عشان يسوي هالقصة اللي انتو ألفتوها وصدقتوها =\

خلكم اكبر من جذي .. وادعوا حق ابونا جابر الله يرحمه ترا الحين ما تنفعه الهوشات والنجرة .. ما ينفعه الا الدعااااااااااا ااء والعمل الصالح ..1

[N.Al-Mutawaa]

واحد من المستقلة يشق باج مستقلة؟؟

و على فكرة... مو إحنا إللي نؤلف و نصدق!
عارفين نفسهم ترا!!

[Don 3ziz]

^
^
^

في ناس تسوي هالحركة ياخوي :)

احنا مو عايشين بالعالم المثالي ( اظن انك فاهم قصدي )

[السواء]

^
^
^

في ناس تسوي هالحركة ياخوي :)

احنا مو عايشين بالعالم المثالي ( اظن انك فاهم قصدي )


الله يهني هالناس .. ويبعدنه عنهم

عدل كلامك حنا مو عايشين بالعالم المثالي !!

[SeiASeYaH]

الله يكبر عقولهم قولو امين..

[alfares]

موضوع جداً مهم!!
لم أعتقد بأن هناك من سيعقب على الموضوع..
فليس هناك ما يقال..
هل نسيتم ما تنصه مبادئكم؟؟
من الأبتعاد عن السطحية والتعمق في النظر إلى الأمور..
أم انكم لا تذكرونها إلا وقت الإنتخابات؟؟

[Lake]

السلام عليكم ....

للأسف نجد ان البعض لمجرد الاختلاف في الفكر أو القائمة يتعامل مع المنافس بكره واتلاقية حتى سلام ما اسلم ! ..

على طاري الباج ... للاسف ننسى ان البعض مؤمن بقائمتة ... وحتى لو اختلف الاسم فيجب احترام المنافس ما ايي وشج الباج ولا اقوم برمية على الارض .. ياناس احترموا نفسكم عشان الناس تحترمكم ...

والله منو الى سوا هل شي .. فما اتوقع ان واحد من المستقلة بقوم وشج باجه .. ماتدش العقل ! .. ولا انقول ان واحد من المتحدون .. الى سوا هل شي للاسف ما يستاهل ان حتى ايكون مقيد في الجامعة ... فما بالك ان اكون عضو في الجامعة يقوم بتمثيل الحركة الطلابية , عن طريق انتمائة لقائمة ما ....

وشكرا

[Al-ShaiJi]

ماكو فايدة .... يعني خلوا كل المشاكل اللي المفروض يحلونها بالجمعية .. و شقوا باج
و الله حالة

[Don 3ziz]

Lake .. عدل كلامك والله مرات نشوف هالمناظر بالجامعة شي يكدر صراحة =\

Al_Shai_ji .. ما عرفنا الحين !! الفاعل مجهول ولا مو مجهول !!

[^مستقلاوي^]

سواء الفاعل مستقل ولا اخونجي كلنا اخوان .....سوري أوووبس اقصد أخوه

كبرو عقولكم ...يقتل القتيل ويمشي بجنازتووه
ضربني وبكى وسبقني واشتكى عييييييييييب
إخونجيه

[+88]

الاخ دون عزيز مع احترامي لك بس احنا ما ألفنا قصة و احنا اكبر من جذي و محنا محتاجين احد يذكرنا بهالشي و اعتقد السالفة صارت جدام مجموعة من الطلبة اذا تحب تتأكد !!

ثانيا لازم تعرف ان احنا ما همنا ان ينشق باج المستقلة كثر ماهمنا ان واحد يشق باج يحمل صورة الشيخ جابر الله يرحمه و هذا مو بس مايستحق يكون طالب بالجامعة هذا مايستحق حتى يعيش على هالارض لان اللي يسوي هالافعال أقل ما يقال عنه انه مريض نفسيا وناكر للجميل !!

واذا مو مار عليك الباج اللي وزعناه بكلية الحقوق بمناسبة وفاة الشيخ جابر الله يرحمه فأحب أوضح لك ان الباج ما انكتب عليه حتى اسم المستقلة لان هذا اقل شي نسوي حق ابونا جابر مو مثل بعض ( الاخوان) اللي حتى بهالمناسبات يشوفون الموضوع من زاوية الانتخابات و الاصوات !!

عييييييب يا (اخوان) و بعد ماكفاكم لعب بالدين كملتوها لعب بالوطنية و استهزاء برموز الكويت !!

و اذا كنت تحب تعرف اذا كان الفاعل مجهول او معروف فأحب أسألك شنو السبب اللي يخلي واحد يهاجم شخص قال عن اللي شق الباج انه حيوان ؟؟!
يعني فرضا انا شفت الباج مشقوق و اقول ان اللي شق الباج حيوان و اشوف واحد ماله شغل بالموضوع يقوم و يرد على صاحبنا و يتهاوش معاه !! اتمنى ماتكون الاجابة صعبة :aa_breakfast:
تعودنا من بعض (الاخوان) انهم يقلبون الحق الى باطل في زمن صار فيه (الاخوان) اصحاب حق !!

[N.Al-Mutawaa]

نفس ناس ردودهم بالمنتدى مالها داعي... و ما يثمنون كلامهم
يالله فكنا منهم!

[C.S.S _ GiRL]

للاسف انه في اشخاص بالجامعة ذات عقلية صغيرة وسطحية لابعد حد